سقوا سقى الله من مطر كـل ناشـي=ربعٍ لهم في منبـت القفـر مغبـاش
يتلـون درب اللـي لبرقـه تواشـي=كثحه على حد السمـا تقـل لطـاش
كم مـرة بيـن السفـر والغطاشـي=دكوا على جول المها منه وأنحـاش
وبنوا به اللي مثل روس الدشاشـي=مثل القور ماهن هداريس وعشـاش
لاشافها الجيعـان جـاك متحاشـي=يقلط على بيض المناسف والاكبـاش
وصفر من الصالي لهـن اجتواشـي=يصوك ريح ابهارهن كـل ماغـاش
والتمر والمركـا ودمـث الفراشـي=زل ٍ برومـا لـه مـوزع ونـقـاش
ماحسبـوا تـال الشهـر للمعاشـي=ولاسعروا حمل البواخر على الطـاش
بالسوق عملتهم ماغيـر المواشـي=اللي من اللي ينبت الغيـث تعتـاش
وإن جـاء بلدهـم زاد ولا قماشـي=وسمعوا ووافاهم بالاخبـار طـراش
ودوا لسوق البيـع فاطـر وحاشـي=والمندرج بالسوق من باق الادبـاش
والطيب سعره صعـب ماهوبلاشـي=فازوبه اللي يدفعـون الثمـن كـاش
ماجاب غيـب قلوبهـم كـل واشـي=بين القبايل ذكرهم يدهـش ادهـاش
مافض مجلسهـم خطـاة الدفاشـي=اللي يتوع بكلمـة تصطـح الجـاش
همـاز لـمـاز هـبـود اريـاشـي=سبـاب نمـام مــراوغ وهــلاش
الليـا نصحتـه زاد شـره وطاشـي=انحل امانه وانفـرط تقـل رشـاش
ينبش جثث ناس بها الـدود ماشـي=وسط اللحود اللي توحـش توحـاش
حـرااام فيهـا مايجـوز النقـاشـي=جنايز حـدر الثـرى كيـف تنـاش
كـل العلـوم الطيبـة فـي تلاشـي=تمضحلت واللي بقي ( طاش ماطاش)
