راكب اللي والنجـوم اللامعاتـي=في سماهن والصباح يشع ضيـه
بين حي الجامعـة والمرسلاتـي=واستدار امع الخطـوط الدايريـه
ما التفت راعيـه يـم اللافتاتـي=حافظ كـل الخطـوط الريسيـه
أول أسمه بالثـلاث المفرداتـي=رقم خمسة بالحـروف الأبجديـه
تـو لوحاتـه عليـه مركباتـي=صادرات من مـرور الناصريـه
وارد تـوه حديـث مواصفاتـيي=لتهـب بديـه ويلمـع داخليـه
كن طبلونـه جهـاز مراقباتـي=في حدى المستشفيات المركزيـه
شاشة لنباتهـا مثـل السفاتـي=للدمـاغ مخصصـة والباطنيـه
تنكشف به بالظروف الطارياتي=دقة القلـب السريعـة والبطيـه
وكشنه الداخل زلـول ناعماتـي=قبتـه وارضيتـه والجانبـيـه
والمراتب من جلـود الزاحفاتـي=ما ادري هو جلد داب أو جلد حيه
ماقطعت الشك ميـر مموهاتـي=مثل تمويـه البـدال العسكريـه
بديه أدهم والخطـوط مذهباتـي=مثل عقد الماس في عنق الفتيـه
والزوايا والركـون مصفحاتـي=مايله والواجهـه مثـل الخليـه
بين شمعـات صغـار مربعاتـي=والعلامـه وردة فـي مزهريـه
يوم مريت العيـون الساهراتـي=قوةٍ للأمن فـي حجـم السريـه
قبل ما آقف عندهم واطلع اثباتي=صفو العسكر ودقوا لـه تحيـه
مشترينـه للديـار النازحـاتـي=والخطوط المتعبـات السرمديـه
الطوال اللـي تشـق النايفاتـي=باتـلات مثـل بطـن البندقيـه
ماتخاويتـه الريـاح الذارياتـي=والوحش والطايرات المروحيـه
كن له جنحان مثـل الطايراتـي=يرفعنـه فـوق مـدري جاذبيـه
وكن ماله من خلاف مساعداتـي=قـوة الماطـور ترفـع مقدميـه
وان عطيت ابه الفجوج الخالياتي=فزته تعطيـك عـزم ومعنويـه
ماوقف يطبـخ بلوفـه ذايباتـي=والشـراب مغلـق مـن تانكيـه
وإن نظر راعيه مع كل الجهاتي=مايشوف الا الخـلا والمهمهيـه
للسراب وللمعاصيـر اعتماتـي=عبلةٍ جـردا وشمـسٍ صنقريـه
وأيس المسكين من تالي الحياتي=وأرتكى فوق الكفر يكتب وصيـه
كن جَلده جَلـد خيـل هاجماتـي=أول الغارة فرس شيـخ الغزيـه
أن هجم قدم السبـاق الأولاتـي=يشتبك هو والعدا فـوق العبيـه
وان رجع يثني خلاف التالياتـي=يقهر السْبـق ويرجـع للرديـه
وإن كسب حم الذرا والمسرجاتي=مايخيب ضن من قـال الحذيـه
غازيٍ يبغى النقاء قبل الفواتـي=غاديٍ له عنـد عدوانـه شفيـه
أزعجنـه بالصيـاح الناعياتـي=كل ما نادى المنادي في سميـه
أتعجـب بالعلـوم الماضيـاتـي=وألتفت في موتري واذكر مزيـه
مع جراديح الحـزوم النابياتـي=كن حذفه للحصى حذف أهوشيه
لا وطى له مروةٍ راحت شتاتـي=كل قطعة طيرت مثـل الشضيـه
يم حايل من شمـال امغرزاتـي=ماقصد غير الطهيمي في مجيـه
ناصٍ عليان في موضوع ذاتـي=مايسـده واحـدٍ مابـه حميـه
